HATIM zirlai tithate lawmpuina hlan
30th October, 2020
BCM Education Department chuan kum tina a buatsaih thin zirlai titha te chawimawina hun Ni October 28, 2020 (nilaini) khan Sap Upa leh Pu Buanga Hall, Serkawn-ah neih a ni.
Kum dangah chuan hetiang hun hi Graduation Ceremony ah Khuallian neiin, Institution zirlai zawng zawngte leh zirtirtu te nen hman thin a ni.Kuminah erawh chuan hrileng avangin Institution khar a ni a, function neia punkhawm a rem chan tak loh avangin Pu Buanga leh Sap Upa Committee Hall, BCM Headquarters Office Serkawn-ah mi tlemte hmaah lawmpuina thilpek hi sem niin, zirlai ti tha te aiawhin HATIM Principal Pu V.Vuansanga’n a dawng a ni.
Zirlai ti tha lawmman dawngtu te hi tunhnaia University result chhuaka Higher and Technical Institute, Mizoram (HATIM) atanga Stream hrang hranga Top-ten-a lang zirlaite an ni a, Subject hrang hrangah Top ten a lang mi 20 zet an nei a ni.
Social Works (BSW) ah University Top Ten, pakhatna atanga 10-na thleng an nei a, Bachelor of Computer Application (BCA) ah University Top-Ten-ah mi pathum – Pahnihna, Pathumna, leh palina an hauh a, Bachelor of Commerce (B.Com)-ah Top ten-ah mi pali langin, Pakhatna, pathumna, Pariatna leh Sawmna an hauh a, Bachelor of Arts (B.A.) ah mi pathum neiin – Pahnihna, palina leh parukna te an hauh bawk a ni.
HATIM Zirlai ti tha te lawmman hlanna tawi hi Rev. L.Vanlalsanga, Director, Education Department BCM in kaihruai in, lawmman hi General Secretary leh Associate General Secretary pahnih te bak ah pension-a chhuak mai tur Pi M. Lalthanzuali ten an sem a ni.
